Exo 29 | ZomZIV | STEP | “Amaute in ka siampi nate a sep theih nadingun nang sep ding hihte ahi hi: Kawkbaanna a nei lo bawngtalno khat le tuutal nih la in.

Exodus 29

Siampite Siansuahna

1 “Amaute in ka siampi nate a sep theih nadingun nang sep ding hihte ahi hi: Kawkbaanna a nei lo bawngtalno khat le tuutal nih la in. 2 Mangbuh-vui panin silngo sawh loin anlum bawl inla sathau tawh a kihel le tui le sathau tawh a kinuh moh bawl in. 3 Tuate lawh khat sungah koih inla, tua sungah tuate - bawngtal le tuutal nihte tawh piakhawm in. 4 Tua ciangin Aaron le a tapate Kikhopna Puanbuk sungah lutpih inla, amaute tui-in sil in. 5 Tua puante la inla puantungsilh, siampi puan-aktualpi, siampi puan-ak Aaron silhsak inla awmtuam tuamsak in. Ama tungah a siampi puan-ak, khutsiamte gat kawnggakin gak in. 6 A lutangah dialkhip khimsak inla, a dialah kumpi lukhu siangtho khusak in. 7 Nilh sathau la inla a lutungah sungin nilhsak in. 8 A tapate paipihin puantungsilhte silhsak inla 9 amaute dial khimsak in. Tua ciangin Aaron le a tapate ^{▼▼29.9 Hebrew; Septuagint ah amaute tungah} kawng gaksak in. Amaute adingin siampi hina a tawntunga kip thuzek ahi ding hi. Hih bangin Aaron le a tapate na kipsak ding hi. ^b

10 “Kikhopna Puanbuk mai-ah bawngtal na paipih dinga, Aaron le a tapate in a lutungah a khut uh a nga ding uh hi. 11 TOPA omna Kikhopna Puanbuk lutna mai-ah kigo ding hi. 12 Bawngtalte sisan pawlkhat la-in, na khutme-in biakna-tau kite nuh inla, a val lai teng biakna-tau bulah sungkhia in. 13 Tua ciangin a gilpituam a thau khempeuh le a sin tuam le a kalte gel a tuam a thau tawh la inla, biakna-tau tungah tuate haltum in. 14 Ahi hangin bawngtal sa le a vun le a ekte giahphual pua-ah haltum in. Tua in mawhna hanga biakna ahi hi. ^c

15 “Tuutalte khat la-in Aaron le a tapate in a lutungah a khut uh a nga ding uh hi. 16 Go-in a sisan na la dinga biakna-tau pangte na theh kim ding hi. 17 Tuutal semnenin a sungkua teng le a khete sawp inla, a lu le a sanen dangte tawh koih khawm in. 18 Tua ciangin biakna-tau tungah a tuutal buppi haltum in. Tua in TOPA tungah meihal biakna hi-a, a gim namtui TOPA tunga mei-a hal biakna khat ahi hi.

19 Tuutal a khat pen la-in Aaron le a tapate in a lutungah a khut uh a nga ding uh hi. 20 Go-in, a sisan pawlkhat la inla Aaron le a tapate taklam bilhual, a taklam khutpi, le a taklam khepi ah nuhsak in. Tua ciangin biakna-tau tung apang khempeuh sisan theh in. 21 Tua ciangin biakna-tau tunga sisan pawlkhat le nilh sathau pawlkhat la inla, Aaron le a puansilhte le a tapate le a puansilhte uh tungah theh in. Tua ciangin amah le a tapate le a puansilhte uh sianthosaksa hi ding hi. ^d

22 “Hih tuutal panin a thau, a mei thau, a sung thau, a sin tuam, a kalte gel a tuam a thau tawh a taklam phei la in. (Hih in kipsakna tuutal ahi hi). 23 TOPA mai-a silngo sawh loh anlum lawh panin lum khat le sathau tawh kibawl moh khat le tui tawh kibawl moh khat la in. 24 Hihte a vekin Aaron le a tapate khut sungah koih inla, TOPA mai-ah vei-a biakna-in vei in. 25 Tua ciangin amaute khut panin lakhia inla, TOPA mai-ah a gim namtui meihal biakna tawh, TOPA tunga meihal biakna bawlna khat ahi dingin biakna-tau tungah haltum khawm in. 26 Aaron kikipsakna tuutal iik na lak khit ciangin vei-a biakna-in “TOPA mai-ah vei in; tua pen nang tanh ding ahi hi.

27 “Aaron le a tapate a kikipsakna tua tuutal sate: a kivei a iik le a kipia a pheite siansuah in. 28 Hih in Israel mite tung pana Aaron le a tapate in a kaih den uh ahi ding hi. Hih in, Israel-te in TOPA tungah kilawmtakna biakna ^{▼▼29.28 Tang ngeina lemna biakna} a bawlna panun a piak ding uh siampite satanh ahi hi. ^f

29 “Aaron puansilh siangthote, a suan-le-khakte, tuate sunga a kikipsak ahi nadingin amau tang ding uh hi. 30 Ama siampi za a laih a tapa, Kikhopna Puanbuk-ah Mun Siangtho-a biakna nasem dinga a pai ciangin tuate ni sagih sung a silh ding hi. ^g

31 “Kipsak nadingin tuutal la inla, a siangtho mun khatah a sa huan in. 32 Kikhopna puanbuk lutna-ah Aaron le a tapate in tuutalsa le lawh sunga anlum a ne ding uh hi. 33 Amaute kipsakna le siansuahna bawlna, thoihdamna biaknate amaute in a ne ding uh hi. Ahi hangin tuate siangtho ahi manin kuamah in a nekpih thei kei ding hi. 34 Kipsakna tuutal sa ahi a, anlum khatpeuh ahi zongin zingsang donga a kikhamval leh haltum in. A siangtho ahi manin tuate a kine kei ding hi. ^h

35 “Nang kong thupiaksa bangin Aaron le a tapate adingin na khempeuh hih inla, amaute kipsak nading ni sagih sung hi ding hi. 36 Thoihdamna bawl nadingin mawhna hanga biakna-in nisimin bawngtal khat ta pia in. Tua ading thoihdamna bawlna tawh biakna-tau siansuah inla, na apna-in sathau nilh in. 37 Biakna-tau ading ni sagih sung thoihdamna bawl inla, siansuah in. Tua ciangin biakna-tau a siangtho pen suak dinga, a kisuk-khakpih peuhmah a siang ding hi. ⁱ

38 “Hih in biakna-tau ah nisim-a na piak den ding ahi hi: Kum khat a pha tuuno nih. 39 Zingsangin khat pia inla, a khat pen khuamui-in pia in. 40 Tuuno a khatna pen tawh annel hoih ephah ^{▼▼40 Tua pen quart 2 bang (litre 2 bang) hi kha thei ding hi.} khat seh sawm suah seh khat le olive kisuk thau hin ^{▼▼29.40 Tua pen quart 1 (litre 1 bang) bang hi kha ding hi.} khat seh li suah seh khat tawh helkhawm inla, dawntheih-a biakna dingin lenggahzu hin khat seh li suah seh khat tawh piakhawm in. 41 A tuuno dang khat khuamui in pia inla, zingsanga bangin an-a biakna le dawntheih-a biakna in - gim namtui dingin TOPA tungah mei-a biakna pia in.

42 “Khang sawnsawnte dongin hih meihal biakna TOPA mai Kikhopna Puanbuk lutna-ah a hun manmanin kibawl den ding hi. Tua lai-ah nang tawh i kituak dinga, nang kong hopih ding hi; 43 tua lai-ah Israel-te tawh zong ka kituak dinga ka minthanna in tua mun na siansuah ding hi. ^l 44 Tua ciangin Kikhopna Puanbuk le biakna-tau ka siansuah dinga Aaron le a tapate ka siampi nasem dingin ka siansuah ding hi. 45 Tua ciangin Israel-te lakah ka teng dinga amau Pasian ka hi ding hi. 46 Amaute in keimah TOPA amaute Pasian, amaute lakah ka ten theih nadinga Egypt pana amaute a paikhiatpih pa ka hilam a thei ding uh hi. Keimah TOPA amaute Pasian, ka hi hi. ^m